Александер Духнович

ВЕРХНОСТЬ

 

Кто верхности противится,

Родителем поставится,

                    Кто старшому ся глумит,

                    Того и Бог не любит.
 

Того буде Бог карати,

Небуде нигда нич мати,

                    Той все буде немогій,

                    Нещастный, и убогій.

ГРѢХ

 

                    Найболше зло завѣсть

                    Есть; бо она не вѣсть

Почитати полезно,

И думати любезно,

Завѣстію діаволею

                                 Смерть приде во мір.

                    Другоє зло гордость

                    Возвышенна бодрость,

То єсть: себе славити;

И другаго низити;

Гордостію Євіиною

                                 Смерть вниде во мір.

                    Третеє єсть скупость;

                    То найболша глупость

Даремно избивати

Убогому не дати,

И глупою скупостію

                                 Смерть вниде во мір.

                    Сѣми пороками

                    Главными грѣхами

Пыхою, завѣстію

Пустою скупостію

Обѣщанна, но не знанна,

                                 Смерть вниде во мір.

                    Варуйся скупости,

                    Завѣсти, гордости,

Буди щедрый, смиренный,

Буди любый, пріємный,

И ближняго все почитай,

                                 Смерти не бойся.

О ЧЕСТИ

 

Честь єсть найдрагша на свѣтѣ,

                    Драгша сребра, и злата,

Знай ю добрѣ сохранити,

                    Чтобы ти неотята.

Кто о чести мало дбаєт,

                    Сей не много єи маєт,

А кто чести немаєт,

                    Скотови ся равняєт.

МЛАДОСТЬ

 

Посмотри мой Сыне

Пшеничку на поли,

Як прекрасно цвѣне,

Як зрѣет по воли,

Колосок єй бѣжит

В гору, як прут просто,

Горѣ главу держит

И плавлет радостно.

Где вѣтрик задуєт,

Он на тоту страну

Легко ся кланяет

На лѣву, на праву;

Але як достигнет

Пшеничка на поли,

Колос главу угнет

Не дастся по воли;

Бо уже валится

Зерном наполненный,

Праздно не хвалится,

Останет смиренный,

Долов главу спустит

Вѣтровѣ не дастся,

Грубый корень пустит

Смѣло поставится; —

                    Так младец двигает

                    Головку порожну,

                    А мудрый склоняет

                    От разума важну,

                    Так молодый хлопец

                    За вѣтром бѣгает,

                    А премудрый старец

                    Хвалы убѣгаєт.

СЛАВА МІРА

 

Презри сего свѣта хвалы,

                    Порожная слова суть,

Бѣжат яко водны валы,

                    Покоя непринесут;

Кто пусту хвалу глядаєт,

                    За вѣтром летит, валит,

Мудрый хвалы убѣгаєт,

                    Єго дѣло похвалит. —

Бо добродѣтель, и важность

                    Єсть слава сама в себѣ.

Не вредит єй злость, и заздрость,

                    Она свѣтит и во тмѣ.

Хотяй свѣт ю непознаєт,

                    Всегда она свѣтится,

Хотяй ю злость неузнаєт,

                    Цѣна єй невмѣнится.

Что сіє такося случит,

                    То премудрый ти повѣсть,

Сіє искуство научит,

                    И слѣдующа повѣсть:

Под лѣсиком, под скалою

                    Лежит лучка зелена,

Прекрасных цвѣтов силою

                    Пестро єсть украшенна.

Там дѣти ся изберают,

                    Хлопци, дѣвчатка в купѣ,

И весело ся играют,

                    По травѣ, и в халупѣ.

Отцы им ся призирают,

                    Весело радуются,

Что дѣтятка честно грают,

                    И увеселяются.

Не далеко под Калины

                    Соловѣй силно свистал,

Щекал, дробил от всей силы,

                    Луги гласом прелестал.

Но презрѣн был глас прекрасный,

                    Никто его не внимал,

И неслышан пѣвец красный,

                    Сердца не увеселял.

А между тым Зозуленька

                    Обозвалася: куку!

Что то? рекут: се миленька

                    Зозуля єсть на суку!

О як она прелестная,

                    Слышите як спѣваєт,

Она птица небесная,

                    Всю тварь увеселяєт.

Тогда роты отворили

                    Дѣти, стали плещати,

И кукушку выхвалили,

                    Вси начали кукати,

Услышавше Отцы сіє

                    Радостно ю слухали,

Зозулин глас похваливше

                    Сами с дѣтми кукали.

Так прекраснаго Соловя

                    Пѣснь не єсть услышанна,

А прелестная Зозуля

                    Єсть от всѣх величанна.

Так премудраго много раз

                    Презрѣвше ни внимают,

Но лестника и глупый глас,

                    Хвалами возвышают;

Но порожная похвала

                    Мудраго не прелестит,

Єму добродѣтель слава,

                    Она єго веселит.

О БУДУЩЕЙ СУДЬБѢ ДѢТЕЙ

 

А мы хлопци добрѣ чиньме,

Учитися усилуйме,

                    Хвальме Бога, и славме,

                    Каждому чести дайме;

Так мы с Богом поростеме,

Як дубы хлопи будеме,

                    Дужій, и высоки,

                    Грубій, и широки.

Дахто с нас землю дѣлати

Буде, дахто воєвати

                    Будем хлѣба глядати

                    Силно ся спомагати.

Бо то лем тот не выжіє,

Хто душу в себѣ нечує,

                    А здоровый, усилный

                    Будет всягды щастливый.

Здрава рука, здрава нога

Суть наша богатства многа,

                    Руками, и ногами

                    Можно и под скалами

Добрѣ жити, лем робити,

Бога от сердца славити

                    Потребно єсть, бы он нас,

                    Благословил на всяк час.

Не ганьба то працовати,

Землю орати, копати,

                    По купетствѣ ходити,

                    И ремесло робити.

Не ганьба людем служити,

Во чужом будинку жити,

                    Не ганьба працовати,

                    Ни горци друтовати.

Но єсть ганьба, стыд лежати,

Лем от неба вшытко ждати,

                    Найболшій стыд жебрати,

                    От люди выдерати.

Так мы хлопци прото знайме,

На себе позор давайме,

                    Знайме, як треба жити,

                    И хлѣба заслужити.

Може с нас Паном кто быти,

А другій єму служити

                    Дакотрый воєвати.

                    Кров за нас проливати.

Бо то кажда служба добра,

Кедь є в тѣлѣ воля бодра,

                    Каждый став прекрасный є,

                    Кедь человѣк чесный є.

Многи будут с нас вояци,

И гусари, и пишаци,

                    А то єсть став най легшій,

                    Прекрасный, най веселшій;

Бо и Царь наш най яснѣйшій

Єсть вояк сам, а найлѣпшій

                    И Панове вояцы

                    Суть конници, пишацы.

О як там весело жити,

Красно прибрано ходити

                    Ис жабличков черкати,

                    Острогами бренькати.

Там суть бубны, гласны трубы,

И пищалки, тонкы, грубы,

                    Там мусика не встаєт

                    Сердце ся все радуєт.

Як-там красно в рядѣ ити,

На красном кони сѣдѣти,

                    Скакати, и бѣгати,

                    На конику лѣтати.

Но єще най крашше дѣти

Царя, Краину хранити,

                    Непріятеля бити,

                    Як злодѣя гонити.

Бо непріятель безбожный

Не звык отити порожній,

                    Он все бере, рабрує,

                    Палит, губит, мордує.

О мы ему застанеме,

Смѣло му до оч станеме,

                    Выженеме єго вон,

                    Не прійде ту болше он.

Бо наша красна Краина,

Любезная Отчизнина

                    Пожадает то от нас,

                    Храньме ю на каждый час.

О СПРАВОВАНІИ ДѢТЕЙ НА ПОЛИ

 

Уж мы хлопци спилновали,

Загородку покопали,

                    О щастливая доле,

                    Уж пойдеме на поле!

Весело си заспѣвайме

У пищалку засвистайме,

                    Поиграйме красненько

                    Радуймеся маленько.

Выженеме уж ягнятка,

Выведеме и телятка,

                    На пашу веселую,

                    На траву зеленую.

Они будут траву пасти,

Мы будем весело плясти,

                    Мы будеме кричати,

                    Они будут бечати.

Ягнятенька навертати,

И от шкоды варовати,

                    Вести их где єсть паша,

                    Будет повинность наша.

Небудеме мы лежати,

Ани под деревом спати,

                    Бо хто добрѣ не стреже,

                    Вовк му ягна понесе.

Бо то треба позор дати,

И добрѣ остерѣгати

                    Треба притомно быти,

                    На всѣ страны смотрити.

Можно тамся поиграти,

И голосно заспѣвати,

                    Но спѣванку побожну,

                    А не брытку, безбожну.

Часто книшку в руки взяти

И маленько почитати,

                    Мало пораховати,

                    И такся забавляти.

Школярови книшка годность,

Єсть, и най болша маєтность,

                    Сію маєт хранити

                    Всягды с собой носити.

Так ’го буде Бог любити,

Стадо єго сокотити,

                    Избавит ’го от бѣды,

                    От напасти, от шкоды.

Но єще вам добри дѣти

Должно и то порадити,

                    Якся на поли мати

                    Треба вам справовати?

Бо то многи недостойни

Сут, и таки непокойни,

                    Што вшытко ламлют, гублят,

                    На заказ лемся глумлят.

Но котра добра дѣтина,

Богобойна, и невинна,

                    Всегда добрѣ дѣлаєт,

                    От злого убѣгаєт.

Она нигда незавинит,

Шкоду нигде неучинит,

                    Она нич не погубит,

                    И дерева нелупит;

Бо кедь дерево олупыт,

Так его на вѣк загубит,

                    Оно уже пропаде,

                    Болше рости не буде.

Также знайте добри дѣти

Нетреба шкоды робити,

                    Ни на дармо лежати,

                    Но робити, не спати.

Потребнося все учити,

Богуся щиро молити

                    Так вас любити будет

                    Господь Бог помилуєт.

О ДѢЛѢХ ДѢТЕЙ

 

Хлопци спѣшно изберьмеся,

И радостно весельмеся,

                    Ходим землю дѣлати,

                    Загородку копати.

Єден листя сграбовати,

Другій буде складовати

                    На громаду, и лом той

                    Вынесеме аж на гной.

Загородку покоплеме,

И чисто ю заграблеме,

                    Направиме грядочки,

                    Посієме цвѣточки.

В єдной грядцѣ петрушоньки,

А на другой маруноньки,

                    Ту пастернак, ту морков,

                    Цвѣклу червену, як кров.

И гороху насадиме,

Обкоплеме, потычиме,

                    Насієме шалату,

                    Таку крегку главату.

А огурки в теплых грядах

Посадиме на трех складах,

                    Ріпу, часнок, цѣбулю,

                    Орешец, и пасулю.

Коло плота насадиме

Дыни, и обгородиме,

                    Там будутся вязати,

                    И по плотѣ тягати.

Но вы дѣвчатка слухайте,

И на вѣнец памятайте,

                    Вы пилнуйте цвѣточки,

                    Абы плести вѣночки.

Посійте собѣ пахнячку

Зеленую крутумятку,

                    Магеран, и васїлок,

                    Златоглав, и бервинок.

Незабудьте обкопати

Ружу красно повязати,

                    И лелію бѣлый двѣт,

                    От сего крашшаго нѣт.

Бо лелія бѣленькая

Добрым пахом миленькая,

                    Єсть образ невинности,

                    Дѣвичей повиности.

РАДОСТЬ ВЕСНЫ

 

Уже весна зеленая

Настала нам веселая,

                    О то радость велика,

                    Каждого человѣка.

Уже слонце тепленькоє

Загрѣваєт маленькоє

                    Зерно, быліє, траву,

                    Вылудит всю потраву.

От радости земля мати

Трепещет, и вся теплоты

                    Пріимаєт весело,

                    Мразы бѣжат уныло.

Уж на буках брост пучнѣє,

Уже ся лист зеленѣє,

                    Липа уже пукаєт

                    И береза сок даєт.

Птички гласно щеботают,

Весну весело витают,

                    Кличет єдна за другу,

                    Глядает си супругу.

Красно чорный кос спѣваєт,

Рябый дросд мило пискаєт,

                    А зозуля кукаєт,

                    Весну сердцем витаєт.

А там лучка широкая,

На ней трава шовковая,

                    На ней цвѣнут цвѣточки,

                    Пахнячіи листочки.

По травѣ ягнятка грают,

Бодутся, бечат, гуляют,

                    Мягку траву зрывают,

                    Скачут, танчут, играют.

Быстрый поточок ся точит,

По каменьках быстро черчит,

                    Там ягнятка бѣгают,

                    И жажду умоляют.

О Братія! поставайме,

Красную весну витайме.

                    Весело заспѣвайме,

                    Славу Господу дайме.

Бо то Бог так опредѣлил,

И премудро так устроил,

                    Абы лѣто, и зима,

                    Абы осѣнь, и весна.

Таже вси ту изберимся,

На колѣнах помолимся.

                    Господа благодарьме,

                    Пѣснь Єму заспѣвайме:

О Боже наш створителю

Неба земли строителю,

                    Ты люту зиму отгнал,

                    Теплую нам весну дал.

Всяк глас тебе благословит,

К тебѣ поєт, тебе хвалит,

                    Господи выслыши нас,

                    Прійми нашу пѣснь, и глас.

Слонцем, хмарами владѣєш,

Ты теплоту, и дождь даєш,

                    Боже в руках твоих вся,

                    Дождь, теплота, и роса.

Помилуй нас о Боже наш,

Дай нам силу на всякій час,

                    Подай твоєй земли плод,

                    Абы щастливый сей год.

О ЗАБАВКАХ

 

Потребно єсть мой дѣти

И краснося забавити,

                    Весело поиграти

                    Мудро пожартовати.

Игра сердце развеселит,

Страсти духа упокоит,

                    Веселость Дух укрѣпит,

                    Уды тѣла потвердит.

Так дѣточки все весело

Спѣшно чиньте ваше дѣло,

                    И як оно скончите

                    Такся повеселите;

Бо то перше повинности

Докончити, и должности,

                    Дѣлати вся достойно,

                    Так играти покойно.

Но во играх должно знати,

Чести, и на ряд внимати,

                    Никого не квилити,

                    И с никимся не бити.

Не требася надерати,

Товариша задерати,

                    Другого прозывати

                    Албо разгнѣвовати.

Ани зло ничто творити,

Ани брытко говорити,

                    Ани не сваволити,

                    Ни пакости чинити.

Нерушати нич чужоє

Несгубити дашто своє

                    Каждому покой дати,

                    Краснося забавляти.

Бо хто в играх непокойный,

Не иншого єсть достойный,

                    Лем абы ’го отгнати,

                    До игры непріяти.

Но и то потребно знати,

Же во играх все гуляти,

                    И кричати не годно,

                    Битися не слободно.

Суть способы ся играти,

На приклад: красно спѣвати,

                    Смѣшно казки казати,

                    Мудро гадки гадати.

Можно чесно и плясати,

Заспѣвати, засвистати,

                    Поиграти красненько,

                    Побѣгати маленько.

Слободно и лопту бити,

В зеленых лугах ходити,

                    Там срывати цвѣточки,

                    Вывивати вѣночки.

Словом: игры свободныя

Суть дѣтем все потребныя,

                    Но игры не красныя,

                    Суть все заказанныя.

Єще потребно внимати,

И каждому добрѣ знати,

                    Же когдася зогрѣєт,

                    Та воду няй не пієт,

Бо то може пошкодити,

Може дѣтина схворити,

                    Ужся приклады стали,

                    Што многи так померли.

Также и вы мой дѣти

Можетеся забавити,

                    Но на честь все внимайте,

                    На ряд позор давайте.