О СПРАВОВАНІИ ДѢТЕЙ ОКРЕМ ШКОЛЫ
Уж я и то добрѣ знаю,
Што дома чинити маю,
То учитель говорил,
И яся так научил:
Рано стану прекрещуся
Родителем поклонюся,
Дай Боже вам день добрый,
Щастливый, и покойный.
Затым дораз умыюся
И гладонько зачешуся,
Шматы си позбераю,
И чисто вывтеряю.
И так красно облечуся
Приклякну тай помолюся,
Из серденька воздыхну
Дух ко Богу воздвигну.
И реку: «О Боже святый,
Створителю мой преблагій,
Котрый створил свѣт той весь,
И воздвигнул мене днесь:
Буди тебѣ Отче слава,
Честь и поклон, сила, хвала,
Жесь мя в нощи сохранил,
От сна на день возбудил.
Прото тебѣ благодарю
Честь, хвалу ис сердца даю,
Дякую ти Боже мой,
Бѣдный слуга, и раб твой.
Боже под охрану твою
Вручаю днесь душу мою,
Вручаю дух, сердце, мысль,
Во твою Боже промысль!
О Боже мой дай щастливо
Ступити до дня бѣлого,
Бем мог без грѣха жити;
Тебѣ вѣрно служити.
Душе святый ум просвѣти,
Бемся годен научити
Вшитко во славу твою,
Во честь, и ползу мою.
Помилуй и Родителей
Моих добрых учителей,
Сестру, брата, и весь род,
И Хрістіанскій народ!»
А як єм так помолился
Господу цѣлком вручи лея,
Поцѣлую у руку
Отца, мамку, и бабку.
И дораз ѣсти не буду,
Лем собѣ до кута сяду,
Там книжечку отворю,
Научуся лекцію. —
Бо Профессор так нам гварил,
И каждому добрѣ раил,
Абы дораз не ѣсти,
Лемся перше учити.
Бо кед ся уж брюх насытит,
Нерадо ся тогды учит,
Брюх сытый лем лежати,
Хоще, и дораз спати.
Но як уж до школы ити,
Зачнуть бренькати, звонити.
Так ми дасть ѣсти мамка,
Хлѣба с маслом, молока.
Позбераю свою книшку,
Пера, тинту, и табличку,
Мамко здрави будте вы,
Уж я йду до школы.
