- Александер Духнович

О ПОДАРКАХ – А. Духнович

О ПОДАРКАХ

 

Дѣти! вы ся усилуйте,

До школы порядно ходьте,

                    Так учитель днесь казал,

                    И так далей истязал:

Хто все усиловно робит,

И до школы вдячно ходит,

                    Того любит Бог, и я,

                    Той єсть блага дѣтина.

Того буду я славити,

Любити, и все хвалити,

                    Тому буду я Отец,

                    А он буде мой хлопец.

Той будет во первой лавцѣ

Сѣдѣти на первом мѣстѣ,

                    Той буде зачинати

                    Спѣвати, и читати.

Того будут честовати,

Ємуся повиновати,

                    И слухати єго все,

                    Той заставу понесе.

Сей во рядѣ першій ити

Будет, и других водити

                    Так як Ріхтарь у селѣ

                    Буде в чести во школѣ.

Тому будут други дѣти

Лекцію все говорити,

                    Той буде надзерати

                    На всѣх позор давати.

Як то красно буде дѣти,
Кедь будете в рядѣ ити

                    На погрѣб, и до церкви,

                    И где потребно всягды.

О як вас будут славити

Як вас радостно хвалити,

                    Рекут: добрый на предѣ

                    А лѣнивый на задѣ.

Передняго величати,

Из задняго ся смѣяти,

                    Буде каждый, повѣсть: сесь

                    Остатній нич незнал днесь.

А я єще мои дѣти

Дам вам звѣзду учинити,

                    Єдну срѣбром обиту,

                    Другую же золоту.

А красненько привяжу ю

На пантличку червеную

                    Усиловному дам ю

                    Повишу му на шію.

В кого звѣзда, на передѣ

Буде ити первый в рядѣ,

                    Такся буде пышити,

                    Весело величити;

Як Архі Діакон прійде,

Проситися от вас буде,

                    Вы будете казати,

                    Смѣло отвѣтовати.

Котрый добрѣ буде знати,

И мудро вся повѣдати,

                    Того красно похвалит,

                    Лѣниваго заганьбит.

Добраго увидит дораз,

Даруєт му красный образ.

                    Образочок маленькій,

                    Позлаченый, красненькій.

Так то хто ся усилуєт,

Такого каждый милуєт,

                    А хто щиро не робит,

                    Того никто не любит.

Об авторе admin

International Carpathian Institute of State and Law of the Central European
Читать все записи автора admin