- Александер Духнович

О СПРАВОВАНІИ ДѢТЕЙ В ШКОЛѢ – А. Духнович

О СПРАВОВАНІИ ДѢТЕЙ В ШКОЛѢ

 

Дѣти, дѣти дайте позор,

Так говорил днесь Профессор,

                    Знайте якся тримати,

                    И в школѣ справовати:

 

Школярь маєт чистый быти,

И рядно до школы прійти,

                    Умытися красненько,

                    Зачесати гладенько,

 

Власы маєт остригати,

И пахнехти обрѣзати,

                    Має мати свой гребѣнь,

                    И нежичок, и ремѣнь,

 

Ис гребеньком ся чесати,

С ножиком перо стругати,

                    А с ремѣньком книжочку

                    Затиснути табличку.

 

Должен мати книшку свою,

Папірь, перо ис тинтою,

                    Должен мати Ленію

                    И Церуссу сам свою.

 

Бо то школярь не воловарь,

И не пастух, ни не друтарь,

                    Бо то школярь во школѣ,

                    Так як вояк на войнѣ.

 

Должен быти озброєнный,

И силно приспособленный,

                    Должен мати кажду рѣч,

                    Абы не пожичал нич.

 

Рано стане помолится,

И до школы готовится,

                    Научится лекцію,

                    И выгварит тихо ю.

 

Так извяже свою книшку,

Просит хлѣба назакуску,

                    Коли звонят першій раз,

                    Уж маєт ити дораз.

 

Но когда до школы прійде,

До лавочки собѣ сяде,

                    А намѣсто на оно,

                    Что му опредѣленно.

 

Там своя рѣчи разложит,

Кажду на мѣсто положит,

                    Папірь, книшку, и тинту,

                    И ко тинтѣ пороху.

 

И так выгварит лекцію,

Покажет оккупацію,

                    Хто лекцію незнає,

                    Той няй ся нерадує.

 

Той на истѣ уж клячати

Буде, и може зобрати,

                    А то исто заслужил,

                    Чомся дома неучил. —

 

Не маєш ты нич на свѣтѣ,

Лем усилуйся учити,

                    Єсть час вечер, и рано,

                    Учся добра дѣтино.

 

Небѣгай все по улицѣ,

Не плянтайся по потоцѣ,

                    Не сваволь дома, не гуч,

                    Сядь до кута, тамся уч.

 

Забавки на страну одлож,

Перше собѣ книшку розлож,

                    А як будеш все знати,

                    Можеш и побѣгати.

 

Бо хто скончил свое дѣло,

Можеся бавити смѣло,

                    А хто своє премине

                    Того кара немине.

 

Як во Церкви, так во школѣ*)
Справуйся по Божой волѣ,

                    Где кажется, там слухай,

                    А никого нерушай.

 

На страну ся не оглядай,

Где дѣется, там позор дай,

                    Товариша недрыляй

                    И каждому покой дай.

 

Кедь тя учитель закличе,

Албо ко собѣ прикличе,

                    Стань честно, и утрися,

                    Стань там, где ти велится.

 

Кедь ся просит, гварь голосно,

Укленься, и стой там просто,

                    Главу все непрекривляй,

                    И руками не метай.

 

У лавицѣ сѣди красно

А отвѣтуй смѣло, гласно.

                    Учителя все слухай,

                    Єму честь, и поклон дай.

 

Бо учитель єсть твой Отец,

И ты буди єго хлопец,

                    Так ’го як Отца слухай

                    Єму всягды чести дай.

 

Отец тобѣ хлѣба дає,

А учитель тя варує,

                    Абысь мудрый, и смѣлый

                    И на вѣки щастливый.

 

Знай дѣтино Родителей

Честовати учителей

                    И старшого все слухай

                    Каждому чести подай.

 

 Хто верхности противится,

Родителем поставится,

                    Хто старшому ся глумит,

                    Того и Бог не любит.

 

Того буде Бог карати,

Небуде нигда нич мати,

                    Той все буде немогій,

                    Нещастный, и убогій.

Об авторе admin

International Carpathian Institute of State and Law of the Central European
Читать все записи автора admin