- Александер Павлович

ГЛАС РУСИНОВ – А. Павлович

ГЛАС РУСИНОВ

Бескиде, могило на Русинов гробѣ,
Скажи нашим отцам во твоей утробѣ,
Что мы єще жієм, єсме Русинами,
Но любви, ни згоды не є между нами,
Бы они, кедь можно, из мертвых повстали,
А кед нѣт бы духов своих к нам зослали,
Бо мы, их сынове, омлѣты и слабы,
Различныхъ похотей своих мы’сме рабы.
Бурайся Бескиде, скалы ся пукайте!
Духов наших отцев дайте же нам, дайте!
Бы падшую нашу подвигли побожность,
Отняту вернули своим сынам годность.
В тысящрочных гробах праотцы Русины,
Почувше, что помощь молят от них сыны,
Мохом оброснуты поддвигли каменѣ,
Бы ’з их сердецъ любви палили пламенѣ.
Блискало, гримѣло, тряслися Бескиды,
Лем раз отворили гробы свои дѣды,
Из тых вылетѣли голубоньки сивы,
А загуркотали: О, вы несчастливы!
О, вы несчастливы чада наши милы!
Гдеж вам ся подѣли старорусски силы?
Кто вас из природной вашей невинности
Выблекол, позбавил русской народности?
Кто же вас позбавил невинного цвѣта,
Кто вас припровадил во блуд сего свѣта?
Гдеж вам тая вѣра, котру вам Бог зъявил?
Ах, кто же вас того вшиткого позбавил?
Прідут на вас кары, вы злобивы враги,
Что сте спотупили дѣти наши драги,
Что сте им отняли вшитку силу, красу,
Что их зневажате от давного часу.
Премѣнит Господь Бог бескидски яскинѣ
Во свой храм на земли, во свои святынѣ;
Прйдет, уже идет благодарне время,
В котром Бог потѣшит засмущене племя.

*

Но вы всѣ сынове русского имена,
Вам ся уже явит днесь весна зелена,
А вы ся встыдате народного слова,
Милша вам єсть чужа, як отцовска мова.
О, вы ваших предков потомки негодны,
Ни теплы, ни зимны, ани не холодны!
Вы-что свой родъ благій нищите, губите,
А чужину только витате, любите,
То не для вас идет радостная весна,
В котрой скропит Бескид наш роса небесна,
Когда про Русинов придут ярь и жнива,
На вас придут громы и плюта огнива.
Вы русскую, нравно, народну особу
Мучите, бієте, кладете до гробу.
Вы зрадцы, тым грозным самобойства скутком
Цѣлый русский народ прикрывате смутком.
Мы только в надеждѣ в гроб склонили главы
Без ожидаемой покинули славы.
То, что мы желали, за чим сме тужили,
Вы невдячны зрадцы того ся дожили.

Про вѣру, народность нас били, мучили,
Бы сме ся к племенам чужим прилучили.
Мы при том всѣмъ были вирны, постояны,
Вѣра и народность гоили нам раны.
Русин народную пѣснь заспѣвал себѣ.
При свадьбѣ, крестинахъ, так и при погребѣ,
Он в смутку потѣху, — а миру в радости
Глядал в источнику своей народности.
Старших в почтенію все Русины мали,
Их мудру пораду за святу держали.
В Бескидах панувал: покой, любовь, згода —
Тогда процвѣтала єднота народа.

Днесь але о жалю! о смутку великій!
Бо не єден Русин звѣронравный, дикій.
Бій-забій на брата, котрый род свой любит,
Где можетъ, ’му вредит, его працы губит.
Днесь, когда свободу в народности достал,
Отродилец Русин рода зрадцем остал;
Свою ганит, тупит русскую народность,
А в чужой глядаєт честь, славу и годность.
Он вшиткоє злоє днесь в Русинах видит,
Нравность, же єсть русска, прото ся єй стыдит.
Для него суть вшитки цноты, невинности —
Прото что суть русски — грѣхи, фалчь а злости.
Мовов отцевъ своих ганьбится, встыдаєт,
К знищеню Русинов врагам руку даєтъ;
Хочет, бы сгинуло Русиново имя,
С именем цѣлоє славне русске племя.
Он ся с тым побратил, что наш род мордовал,
Что, коль Русин плакал, тогда ся радовал,
Котрый и днесь хочет всѣхъ Славянов стерти,
Своє житя глядат во Славянской смерти.
Несчастлива наша народная нива
Стоит опущена, так як скала сива;
Так як скала сива, стоит русска нива
Доле Русинова, доле несчастлива!
Пусты русски поля, пусты русски луки,
Русски дѣти плачутъ, заломуютъ руки!
В смуток ся одѣла Русинова доля.
Хотя уже сгибла старая неволя;
Смутно задуманый русскій народъ стоит,
Пред свѣт выступити он ся єще боитъ
Стоит задуманый, опертый при буку,
Якбы ждал, бы дакто подал єму руку.
Як малоє дѣтя, что почнетъ ходити,
Смѣлости не маєтъ, кажетъ ся водити.
Так, як тот, что встанул из долгой хворости,
В котрой єго тѣло ослабло и кости,
Хотя уж о своєй властной силѣ встаєт,
Но ко ходу смѣлость не скоро достаєт.
Русин єсть розважный, о томъ добрѣ знаєтъ,
Же кто ся понаглят, часто упадаєтъ.
Давно он-предавно на Бескидѣ сидѣл,
А многих бѣжащих упадати видѣл.
Русин в Бога вѣрит, котрый был от вѣка.
Себе за слабого держит человѣка;
Он в Богу, не в себѣ, вшитко покладаєт.
Богу, а не свѣту, честь и славу даєт.

Об авторе admin

International Carpathian Institute of State and Law of the Central European
Читать все записи автора admin